សៀវភៅប្រវត្តិសាស្ត្រស្តីពីរាជវង្សខ្មែរជាង១ម៉ឺនក្បាលត្រូវបានបោះពុម្ពផ្សាយ

សៀវភៅប្រវត្តិសាស្ត្រខ្មែរដែលបានរៀបរាប់អំពីអំណាច នៅជុំវិញព្រះរាជបល្ល័ង្កនៃព្រះបាទ អង្គឌួង អំឡុងពេលទ្រង់ឡើងគ្រងរាជ្យចាប់តាំងពីឆ្នាំ១៨៤២ និងព្រឹត្តិការណ៍ជាច្រើនទៀតនៅមុនរជ្ជកាលរបស់ព្រះអង្គរហូតដល់រជ្ជកាលនៃព្រះករុណាព្រះបាទសម្ដេច ព្រះ បរមនាថ នរោត្តម សីហមុនី ត្រូវបានបោះពុម្ពផ្សាយហើយ។ នេះបើតាមប្រសាសន៍លោក ឆាយ សុផល អ្នកសារព័ត៌មានដែលមានបទពិសោធន៍ជាង២០ឆ្នាំនិងជាអ្នកចងក្រងសៀវភៅ “អំណាច និងរាជបល្ល័ង្កនៃមហាក្សត្រខ្មែរ សែ អង្គឌួង នរោត្តម និងស៊ីសុវត្ថិ” ។

ការបោះពុម្ពផ្សាយ ដែលត្រូវបានឡើងនាឱកាសនៃព្រះរាជពិធីបុណ្យចម្រើនព្រះជន្មវស្សា គម្រប់ព្រះជន្ម ៦២ ព្រះវស្សា យាងចូល ៦៣ ព្រះវស្សា កាលពីថ្ងៃសុក្រទី១៥ ខែឧសភា ឆ្នាំ២០១៥ ម្សិលមិញមានចំនួន១ម៉ឺនក្បាល ក្នុងកម្រាស់ជា៤០០ទំព័រ។

លោក ឆាយ សុផល បានរៀបរាប់ថា ការចងក្រងសៀវភៅនេះឡើងផ្អែកលើឯកសារពិគ្រោះមានចំនួន៩២ប្រភេទ ដែលក្នុងនោះមានប្រភពសៀវភៅចំនួន៤៤ ក្បាល ប្រភពសារព័ត៌មានផ្នែកបោះពុម្ពមានចំនួន៩ប្រភេទ គេហទំព័រចំនួន៤៣ប្រភេទ និងប្រភពមនុស្សដែលលោកបានជួបសមាជិកញាតិវង្សានុវង្ស និងមន្ត្រីពាក់ព័ន្ធជាច្រើនអង្គ/រូប។



លោកបន្តថា ដើម្បីបានសៀវភៅមួយក្បាលនេះ លោកត្រូវធ្វើដំណើរស្រាវជ្រាវជាច្រើនកន្លែងដូចជា ខេត្តសមុទ្រប្រាកាន ខេត្តប្រាជីនបូរី និងរាជធានីបាងកក ប្រទេសថៃ ទីក្រុងហូជីមិញ ប្រទេសវៀតណាម ទីក្រុងយាំងហ្គូន ប្រទេសភូមា ប្រទេសសិង្ហបូរី កំពូលភ្នំឧដុង្គក្នុងខេត្តកណ្តាល ស្រុកសាមគ្គីមានជ័យ និងស្រុករលាប្អៀរ ខេត្តកំពង់ឆ្នាំង ស្រុកកំពង់ត្រាច និងកំពូលភ្នំបូកគោខេត្តកំពតប្រាសាទព្រះវិហារ រាជដំណាក់ខេត្តសៀមរាប រាជដំណាក់នៅខេត្តបាត់ដំបង ស្រុកមង្គលបុរី ខេត្តបន្ទាយមានជ័យ ព្រះបរមរាជវាំង សារមន្ទីរជាតិ ការិយាល័យអង្គការយូនីស្កូប្រចាំកម្ពុជា បណ្ណាល័យជាតិ បណ្ណសារដ្ឋានជាតិកម្ពុជា បណ្ណាល័យព្រឹទ្ធសភា បណ្ណាល័យមជ្ឈមណ្ឌលឯកសារកម្ពុជា បណ្ណាល័យ DMC នៃសាកលវិទ្យាល័យភូមិន្ទភ្នំពេញ ការិយាល័យក្លឹបអ្នកកាសែតកម្ពុជា ទីស្នាក់ការមូលនិធិ Kondrad Adenauer Stiftung នៃប្រទេសអាល្លឺម៉ង់ប្រចាំរាជធានីភ្នំពេញ និងក្រសួងព័ត៌មាន។

លោកថាកន្លងមក ដោយសារតែអំណាចព្រះរាជបល្ល័ង្ក និងរាជសម្បត្តិផ្ដាច់មុខ ដោយរួមទាំងការជ្រៀតជ្រែក និងការប៉ុនប៉ងដណ្ដើមយកទឹកដីខ្មែរពីសំណាក់ពួកស្យាម [សៀម] និងអណ្ណាម [វៀតណាម] ផងនាអតីតកាល ប្រទេសកម្ពុជាបានកើតកលិយុគ ហើយព្រះញាតិវង្សានុវង្សខ្លះដែលជាគូបដិបក្ខនឹងគ្នាបានទៅពឹងស្ដេចស្យាម និងស្ដេចអណ្ណាមឲ្យជួយរៀងៗខ្លួនវាយប្រហារគ្នាឥតឈប់ឈរ ហើយទីបំផុត ទឹកដីដ៏មហាសាលគ្របដណ្ដប់ទ្វីបអាស៊ីត្រូវបានរួញតូច ឯប្រទេស និងប្រជារាស្ត្រធ្លាក់ខ្លួនតោកយ៉ាក និងត្រូវបានគេប្រមាថ។ “ខ្ញុំគិតថា បើទោះជាសៀវភៅនេះមិនមានដំណឹងអស់សេចក្ដីក៏ដោយ ក៏មានសៀវភៅជាច្រើនទៀតដែរ ហើយសៀវភៅរបស់ខ្ញុំអាចជាឯកសារជំនួយស្មារតីមួយដ៏សំខាន់សម្រាប់មិត្តអ្នកអាន និងអ្នកសិក្សាស្រាវជ្រាវផ្នែកប្រវត្តិសាស្រ្តទាក់ទិននឹងរាជវង្សានុវង្សសែព្រះបាទ អង្គឌួង ព្រះបាទ នរោត្តម និងព្រះបាទស៊ីសុវត្ថិ”។

កាលពីឆ្នាំ២០១៤ លោក ឆាយ សុផល បានចេញសៀវភៅមួយក្បាលដែលមានចំណងជើងថា “នាយករដ្ឋមន្ត្រីខ្មែរទាំង៣៦រូបជានរណា?” ហើយសៀវភៅនេះមានប្រជាប្រិយបំផុតនៅក្នុងចំណោមមិត្តអ្នកអាន។ មិត្តអ្នកអានអាចរកជាវសៀវភៅ “អំណាច និងរាជបល្ល័ង្កនៃមហាក្សត្រខ្មែរ សែ អង្គឌួង នរោត្តម និងស៊ីសុវត្ថិ” នៅតាមបណ្ណាគារក្នុងរាជធានីភ្នំពេញ ក្នុងតម្លៃចន្លោះពី ២៨០០០ រៀល ទៅ ៣០០០០រៀលក្នុងមួយក្បាល៕